سهرة مع ابليس روائع جابر الكاظمي

بسم الله الرحمن الرحيم
السلام عليكم ورحمة الله وبركاته
اللهم صل وسلم على محمد آل محمد وعجل فرجهم وسهل مخرجهم واجعلنا من اتباعهم يا كريم
اقدم لكم اخواني اخواتي مقطع الى قصيدة رائعة رائعة الى الشاعر الكبير جابر الكاظمي ...
سهرة مع ابليس
اتمنى ان تسمعوا وتعطوني رايكم

سهرة مع ابليس ... للشاعر جابر الكاظمي
عن حوار بين الشاعر و ابيلس

قبل كم يوم ليلة واحد بشعبان مثل كل يوم أقضي ليلتي سهران

أبحر للنجوم . أنظر نجم سعدي وتضجور بيبي عيني والسعد مابان

وعلى طبع صحبني من صغر سني أقضي الليل بين مهافة الأوزان

مره أبكي على حالي ومره اتغنى غنى العايش بغربه مو غنى البطران

وآنه ويا القوافي مناوره على الآه وعلى ظيم السفينه الفقدت السفان

وقبل ما أبدي وأكتب صدر أول بيت لن طارش لفاني يطوح بركبان

منهو انت واشجابك بهذا الليل قال ابليس آنه جيت لك سلوان

قلتله وانكمش من لعنة الله عليك يالفرقاك عيد وشوفتك أحزان

عود أبو مره زعل مني وخزرني بغيظ مثل الذيب الأمعط لو خسر زعلان

قال شعندي وياك انه يا بن آدم علي ترمي الشتايم واللعن ألوان

تعال اقعد وخل نتحاسب آنه وياك ومابينك وبيني يحكم الوجدان

أنا الباري أمرني أسجد لآدم وما نفذت حكم الخالق الديان

قلت ياربي آنه أسجد لوجهك لكن كلفه علي ما أسجد لإنسان

خلقت آدم ياربي بقدرتك من طين وآنه الي خلقتني من سنى النيران

غضب رب الجلاله وقال روح إبعد وطردني من العبوديه ورحت ندمان

هذي قصتي ويا الباري يابن آدم هالنوبه أرجع لقصتك يبو فلان

من قابيل أبديها الي قتل هابيل شلون انسفك دمه ذوله مو شخوان؟

هم آنه القطعت منحر النبي يحيى نبي وينذبح ماتجاوبني ذنبه شكان؟

هم آنه القلت ياناس إعبدوني مثل فرعون وتحدى قوى الرحمن؟

هم آنه الردت أغدر النبي موسى يوم الي قلب ذيك العصى ثعبان؟

هم آنه الردت أغدر النبي يوسف مثل أخوته وتالي اتهمو السرحان؟

هم آنه الردت أصلب نبي عيسى على ذاك الصليب قبال أهل نجران؟

هم آنه الجبت وحشي على حمزه وكلت كبده مثل زوجة أبوسفيان؟

وحق ربي الي تعبده الناس يابن آدم شفت منك مصيبه تشيب الرضعان

ابن بضعة نبيك طاح بارض الطف وجسمه بلا كفن وتكفن بتربان

وبني جنسه اعتنت من كل مهب وصوب وصدر حسين صار لخيلهم ميدان

وعقب قتله انحمل فوق الرمح راسه وعلى أيتام وحرايم حرقوا الصيوان

هم آنه القلت اقطع نزاع القوم ياحرمله وروح اقتل طفل عطشان؟

هم آنه السبيت اطفال فوق النوق ويسيره بت علي توقف وسط ديوان؟

اشكثر من عقب قتل حسين أهل بيته شافت محن وهموم وغصص واشجان؟

اشكر ربي لنه خلقني إبليس وما سواني واحد من بني مروان

وما ارويلك شعملت بني العباس روح انشد عليه السجن والزنزان

مصايب لو ان اشرحها المقام يطول ومنهم يطيح على الارض ذهلان

انا ادري شتريد تقول يا ابن ادم الظلم ولي وانتهت الازمان

واحنا بالتطور والعلم صرنا وراح الجهل واهلة وقوض الطغيان

يا طغيان هذا اللي راح يا ابن ادم راح لروسيا اللي هدمت الشيشان

يا دولة اللي مابيها ضيم وجور وياهي اللي ياخذك عنها ضوالنسيان

بالهند المجاعة تريد تنساها والله حرق المساجد بارض باكستان

لو تنسي المذابح من قبل عامين بشيعة علي شعملت افغانستان

شتنسى البوسنه لومن بحر قانا او تنسي الماسي اللي جرت بسودان

او اللقيطة اللي تسرح وتمرح مابين الجنوب وهضبة الجولان

او تنسى العراق شحل عليه من ضيم وبسجن الطواغي ترزح الشبان

يا لوعة ومصيبة تهون يا ابن ادم وياهي اللي التسجر بل قلب نيران

الاسري بالكويت تريد تنساهم او تنسى الغزو اللي حير الاذهان

اشتنسى المجزرة الي جرت بفلسطين لو تنسى اليهود الي حرقوا القران

من مين تخاف وليش تخاف هذا انت اللي ربك رفعلك شان

تخاف من اللقيطة دولة اسرائيل طلعت بمذلة من ارض لبنان

زعلت !! جنك كلامي ما يصرفلك طبعك هذا طبعك يا بني الانسان

وكل هاي وتسميني اللعين ابليس وتصيرانت الوفي وانا إنحسب خوان

اختمها بعد وياك يا بن ادم كنّـك ما تريد لسهرتك سلوان

لكن عندي وصية وياك إذا تريد تلعن العن نفسك ولا تلعن الشيطان

من ديوان الاديب الشاعر جابر الكاظمي

وأيضاً هذا رابط للي يريد يسمعها صوت او يحملها

http://www.alsada.net/tasjelat/sahraibles.rm

ونسالكم الدعاء
تحياتي

Admin عدد الرسائل : 3 تاريخ التسجيل : 09/05/2007

اخي السجاج نحن نشكرك على جهودك و تقديرا لك سوف تصبح مشرف منتدى النكات lol!

( المدير)

مشكور اخويه على الموضوع
تحياتي

مشكور

تحياتي وشكرا على المرور